America ram hmelchunhnak thantar hi US um mi Chin mi zungkip, Khrihfa bu kip ah hmuh awk tha in a um a herh ngai. Miphun puai CND puai, Tho puai, Fanger puai tbtk kip zong ah American flag cu zapi hmuh awknak hmun ah chiah ve a herh hringhran. America ram pi kan upatnak langhternak a si i, America ram hi kan ram a si ve, kan dawt ve, kan kilven lai i, kan zohkhenh ve lai tinak zong a langhter.
America ram caah Flag le Seal kong cu nawlbia (code) ah ser a si i, American ram hruaitu hna congress nih fehternak tha tein tuah a si. American flag cu a tungtlang cuzat zei rawng zei design siseh titiang tling tein “Title 4 of United States Code” i Chapter One ah khumh dih a si.
Atulio hman cuahmah mi American flag cu kum 17 a simi Robert G. Heft timi nih 1958 kum ah school project pakhat a rak tuahmi a si i, B- a rak hmuh. Mah cu cu design cu design 1500 renglo lak ah Congress nih a tha bik tiah an rak thim.
America Flag chung um mi hna le sullam hna
(1). Arfi (50) – 50 White Stars
America ram ah State sawm nga a um caah Arfi (50) nih hin cu State 50 cu hmelchunhnak a tuah. Arfi dihlak an i tia dih. A sullam cu State pakhat cio nih uknak nawl ngeihnak kong ah ai ngaw/khat dih tein naw ngeihnak an ngei tinak a si.
1958 kum tiang cu Alaska le Hawaii cu US ram um mi an si nain US State tiah telh si rih lo caah National flag ah hin arfi (48) lawng a rak um. 1859 ah Alaska State cu Rusia ram in $7.2 million in rak cawk a si i, Alasaka cu US State pakhat ah co ve hnu 1959 kum
in Arfi 49 ah chap si. Hawaii cu US state pakhat ah relh a si hnu 1960 hnu hin, America flag cu Arfi (50) in vun ser a si.
House of Representatives nih 1977 kum ah chuahmi cauk pakhat nih cun Arfi kong hi tihin a tial “The star is a symbol of the heavens and the divine goal to which man has aspired from time immemorial; “.
(2). 13 Red Stripes; Rong Senmi Rin 13
America thantar cung ah a senmi in aa rin mi (13) a um. A langhter mi cu America ram rak dirh hmasa lio i colony peng (13) hna kha a langhter. US ram cu Europe in arami ralzam hna nih an rak dirh i, cu ralzam hna umnak hmun cu The Great Britain timi mirang nih kan mah minung – kan colony nan si an rak ti i an rak pen thotho hna. 1776 kum ceo ah hin British cu an rak doh than i America ni chuah lei rili kam um mi State (13) hna nih independence kan si, ho hmanh nih a kan uk lo tiin an rak thanh. Mah cu cu America ram a rak i semnak a si. Cu tin America semnak colony (13) hmel chunhnak cu A senmi tlar 13 in rin a si.
Cun a senmi tlar 13 nih a langhter than rihmi cu Nika in a hung chuak mi (rays) a rak cermi tiin zong hmuh khawh a si ve.
America Flag design hi 1776 in 1960 kum tiang ah vui (27) thlen a rak si.
(3). America Flag tar ning
Americ flag cu a leng ah thlai ah cun a par zik tiang thlai ding a si. Ni sunglawi simi Memorial day si lo ah US President nih half in thlai ih ti caan poh ah le ralkap an thih tik ah America flag cu zatceo ah rak thumh in thlai a si.
Zei tik hmanh ah America flag vulei ah i bual hlah seh. A tung in thlaimi flag a hri a cat sual i vulei ah a tlak ah cun rianrang in char awk a si. Ralkap hna nih nunnak thap in ralram ah mah hi thantar cu an kham. Ral tei tik ah America Flag cu uang ngai in thlai a si. Nel Armstrong Thlapa cung a kai lio ah America flag cu an phun taa. Mars cung ah curiosity rover timi US nih a thlah President Obma le John Beiden min thutmi National Flag thir pheng cu Mars cung ah an phun ve.
America flag thlai kong ah nawlbia zulh awk upadi ngai ngai um lo, caah thlai palh sual ruang ah tlaih khawh – azizut khawh a si lo.
(3). Upatpeknak ningcang
America Flag upat peknak caah America ram hla ‘The Star-Spangled Banners’ timi hla si lole ringawn tum in upat pek a si tawn. Sianginn mipi tonnak ah siseh, ramkhel lei tonnak ah siseh, mino zangcelhnak, America football celhnak tbtk le zuamnak phun phun um tik ah, puai onnak caah America thanthar cu ram hla sak bu in upat pek a si. Cu tin upat pek tik ah;
(1). Mipi dihlak dir bu in upat pek a si. Thut ding hrim a si lo. Khuk zong i bil rai si fawn lo.
(2). Vawrh lei kut cu keh lei tang cung ah chuan i upat pek ding a si.
(3). Dai thlep tein le, ding rep tein hla a dih hlan lo dir a herh
Bia donghnak
Khrihfa bu kip nih America flag cu quality a tha bakmi i cawk cio i dawh tein, zapi hmuh khawhnak hmun ah chiah awk tha a si. America Church tampi ah tihin hmuh khawh a si. Church building le hmunhma a ngei cangmi hna nih cun a leng hrimhrim ah National flag cu thlai ah cun thiltha tuk a si. Mah hi ram nih a kan dawt, bang in ram hmel chunhnak flag cu kan upat ding le kan ttihzah dingmi kan i uang dingmi a si.
Salai Biak L Sang
