USA ram ah Chin Khrihfabu a tambik fonh in tuahmi Chin Baptist Churches of America (CBCUSA) civui a vui 6nak cu Indianapolis, IN, USA ah tukum hi tuah a si lai. CBCUSA Civui kong he pehtlai in CBCUSA headquarter office ah CCI nih contact kan tuah hna i mah hi civui kong cu kan hal hna. CBCUSA ah hin Chin Churches lawngte (102) an um tiah theih a si. Indiana Chin Baptist Church (ICBC) nih inntek in tukum CBCUSA civui cu tuah ding asi tiah kan theih.
“Tu tan tuah dingmi hi CBCUSA i a vui 6nak civui a si lai i, hruaitu upa hna thimnak election zong aum chih ding a si. July 5-8 2018 hi tuah a si lai. July 5 ni khi cu meeting tuah dingmi BM palai hna simi khual an phan hmasa lai. Cun cawn July 6 ni khi meeting a si i, election tuah ding ni cu a si. July 6 zan, July 7 chun he zan he, July 8 chun tiin pumhnak khawmpi cu a um dingin timh a si.” tiah CBCUSA office Secretary a simi Pu Kepling Khengmual nih CCI sin ah a kan chimh.
CBCUSA civui a vui (5nak) zong hi Indianapolis khua ah 2015 kum ah rak tuah a si i, mah lio Zophei Christian Church (ZCC) a tu Zophei Baptist Church nih inntek in rak tuah a si. Khual tampi an rak phan i, Indianapolis khuami caah thluchuah ngai a rak si.
Tutan a vui6nk civui ca zong ah khual zeizat hrawng dah phan ding ruah chanh a si tiah CBCUSA office cu kan hal hna.
“USA ram State dang dang in Khual 2000+ leng hi phan dingin ruah chanhnak kan ngei.” tiah CBCUSA office lei rian ngeitu hna nih a kan chimh.
Civui tuahnak ding hmun cu “Greenwood Gathering Place” ah hin a si lai ti zong in kan theih. Greenwood Gathering Place cu 2015 kum lio i CBCUSA vui 5nak civui rak tuahnak hmun a si. 2013 kum lio zong ah CYONA conference tuahnak hmun a si fawn. Hmun tha ngai a si i, minung tam ngai te a tlumnak hall nganpi a si. Chin mi tampi umnak sang ah a um mi a si.
Mah hi vui 6nk Triennial Civui ah hin Kawlram lei in “Chin Baptist Convention in siseh, CACC le Association dangdang cio in sawm mi khual lian hna zong an phan ding a si. Cun, Mizoram Mara district lei in GS le EM, le Lawntlai Laimi Khrihfabu in GS le EM hna siseh, Bawm ram in minung (2) hna zong phan ding an si. Europe le Australia ram lei zong in zumtu hna sawm an si, an rak phan ve lai” tiah CBCUSA headquater office in thawngpang kan theih.
Hlasak thiammi hna zong sawmmi an um. “ICBM program in hlasa thiammi hna le kawlram CACC ram in minung (15) thimmi chung in visa a hmumi hna zong an rak phan lai, cu ah cun hlasak thiam Fam Nawn Tial le adang hlasa thiam hna an i tel” ti zong in a kan chimh rih.
CBCUSA civui a um tik ah hin Indianapolis i chawdawr hna le restaurant hna siseh, a dang dang business hna ca zong ah thiltha a si tawn. Indianapolis khuapi ca hrimhrim ah thluachuah a si.
Thawngpang fiang deuh in CBCUSA office pehtlai a duhmi hna caah
7216 US 31 South
Indianapolis, IN 46227
www.cbcusa.org
phone: 317-489-0383
hna ah hin pehtlai khawh a si.
