Kum 10 dan ah voikhat lengmang tuahmi US milurelnak (Census) 2020 cu thok a si cang. Milurel hi a biapi tuk mi a si caah phaisa tampi le caan tampi dih in tuah lengmang a si. Minung man kan ngeihnak zawnte cu atu caan bantuk i kan miphun i rel kan sinak te hi a si. Miphun pakhat caah Milu tam cu thil ti khawhnak caah siseh, ṭhanchonak ca ah siseh, politik ah siseh, zei kipah a biapi tukmi a si. Cu caah tutan milurelnak ahcun kan zapi in “Chin” bak ah kan min kan ṭial dih hna lai. Cuticun kan miphun kan dirkamh hna lai. Kan miphun Identity le ṭhanchonak hi kanmah te in kan dirpi a haumi a si. Cu caah pakhat hmanh nih tlolh lo in tuah cio dingin Chin Community of Indiana (CCI) nih upatnak he kan in sawm hna.
Chin mi tam deuh cu khrihfabu, khua le tlang in a cawlcang mi kan si caah cu bu i hruaitu vialte hna, cu hlan vialte miphun le ram caah nan ṭuan tawn bangin tutan zong caan a um lio te ah biatak te in cawl khawh izuam hna usih. Tutan i kan min cazin ṭha te in “Chin” ah kan pek dih ahcun kan tuanbia kan thlen khawh cang lai hih. US ah Chin mi zong mipipa kan si khawh venak dingah tutan hi a biapi cemmi a si. Cu caah hi zohchunh (sample) ding mi ca kan thilmi hi nan khrihfabu, khua le pengtlang pehtlaihnak nan ngeihnak kipah rak kan kuat piak chin ulaw, forhfialnak zong rak kan ngeihpiak chap cio dingin kan in nawl hna. Hi pinah nan fian rih lo a si zong le Chin Center (317) 300-1078 ah bawmh hal khawh peng a si ko lai. Chin miphun na dawt ca le na dirkamh caah kan in upat, kan ilawm. Miphun dirkamh caan ah ṭang ṭi hna usih!
Hika link ahhin Sample a um….
https://docs.google.com/presentation/d/1M-JEi_dZZGuTMDD56hm_tIgeMRnq7wsY1K9BPjrECIE/edit?usp=sharing
