Vei tampi fale nauhak pawl in, “Naute khuitawk in a rak suak?” ti’n thusut an hmang ṭheu. Cuvek thotho in, tleirawl pawl in, “Nu le pa sinak hi ziangti’n kan hmang daan/ve ding?” tivek thusutnak a um ṭheu. Nauhak te ihsin, tleirawl pawl in hivek (sex) thu nu le pa an sut tikah …….
1) Sim hmaisatu si ringring aw: Rualpi hnen le lenglam ihsin, a si lo zawngin, thuhla an theih hlanah, minung kan taksa um daan rak sim cia tum aw. Fala/tlangval an neih hlan ihsin, an taksa ih thlengh aw dingmi le ra cang dingmi pawl sim cia in, Pathian duhzawng ih kilkhawi aw thiam dingin, zirh aw.
2) Tampi sim aw: An lo sutmi hnakin 20% tam sawn in sim thiam tum aw. Ṭongfang hmang thiam in, tawi theibik in an thusutmi sang tum awla, an lo sut saal daan ih zirin, sim bet thiam tum aw.
3) Felfai te’n sim aw: Zahmawh (body part) cu a sinak vekin, ṭonglem hmang loin, a sinak vek cekci in sim sawn aw. An kum ih zirin, an theithiam thei dingin, fiangzet in sim tum aw.
4) Sim awla, ngai ve aw: Mah lawng in sim ringring loin, anmahlam ih an lo simmi khal ṭha te’n ngai sak ve aw. Na theih lomi kha thei vekin sim loin, “Na thusutmi a ṭhatuk, information tam deuh ka hawl ta dingih, kan sim aw saal ding” tivek in sim thiam zuam aw.
5) Thindai te’n sim aw: An lo sut tikah, lau in mangbang hlah. Na zum baan lomi tiang an lo sut tikah, thingheng loin, neem te’n sim thiam tum aw. A ṭul asile, cawl ta awla, thlacamnak khal neita in sim ṭha tum aw.
6) Ṭan tlang thiam ding: Nu (nupi) hnenah hiveklam sim/sut hi, fa le hrangah a ol men ding. Asinan, hmuh suakmi pakhat cu, pa (pasal) le pawl hivek thuhla sim tam pawl ih fale cu nu le pa (sex) sinak lam ah an thianghlim duh cuang ti a si. A cang thei a si ahcun, nupa rori in ṭanlaak ih zirh/sim ding a si.
7) Pathian thu thawn zirh aw: Biaknak le nuncan ziaza kilkhawi awknak hi a peihtlaih awmi an si. Nu le pa ih Pathian thu thawn ṭha te’n zirhmi pawl cu, nu le pa sinak (sex) ah, an fel cuang ti’n hmuhsuak a si. Cubakah, Hmuhsuakmi pakhat lala cu tleirawl 45% in nu le pa sinak sup awknak nun an neihnak hi, Pathian thu an theih ruangah a si an ti.
8) Biak/sim hngai aw, danglamnak a nei: Nu le pa (parent) thawn nel awzet le naihzet ih ummi fale pawl cu nu le pa (sex) sinaklam ah, thianghlimnak an nei duh cuang. Na fa le nelzet le duhdawhzet in biak/sim ringring tum aw. Nu le pa sinak (sex) cu a thianghlimmi Pathian laksawng, nu le pa si (neih awk hnu) hnu lawng ih hmang dingmi a si ti Bible thawn sim fiang thei tum aw.
(Hminsin: Mirang ih nganmi leh saalmi a si)
*************************************************************************************
