US Chin miphun tuanbia ah a um bal rih lomi, theih duh bak lomi thawngpang nih US Chin mi khuaci a muihter. October 1 in 10 Kar ah US ram chung ummi Chin miphun chung ah thih lohnak 6 a um.
Columbus Ohaio State ah hin Laimi tam nawn an um ve i, mah ka khua ah hin ruak pakhat suan a si. Sang Lian Ham a si, a nih hi Thantlang Biakinn sang mi a si. Dam loin sau ngai a kuah cangmi a si.
Cun, Laimi tam bik umnak Indianapolis khua ah Tlangval Tawk Cung Nung, kum (36) nih mual a liam tak hna. Tv Tawk cung Nung ruak cu thaizing October 11 ni ah hin a khrihfabu simi CEBC nih an thlah lai.
Cun Tedim lei upa pakhat simi Thawng Sian Pau kum (62) zong mual a liam. Anih hi September 27 ni ah khan a nunnak dih cang nain, October 7, 2017 ni lawng ah a ruak thlah a si.
Cu pin ah Forthworth Texas khua ah Tlangval pakhat i velhnak in a nunnak a liam hawi. Athimi cu Sang Lian ti a si. Amah inn lila ah zu an dinnak ah adang pakhat nih thutdan in a tuk i sizung ah an phan nain, sibawi te nih an khamh kho ti lo i a thi. Mah tiin thil a can cu October 5 zan ah khan a cang cangmi a si i, a nunnak dih tiin sizung nih an thanh hi nizan ceu ah khan a si.
Houston Texas State i CEBC Biakinn i an Church Chairman simi Pu Uk Tu nih a liam tak ve hna. A nih a thihning hi ruah lo piin a si.
“Chin Emmanuel Baptist Church ah Church chairman rian atuan cuahmah mi Pu Uk Tu (44) hi Hakha peng Ruan khuami asi. Fanu pa 4 le fapa 1, cun Tu 3 angei mi asi. Pu Uk Tu hi kan Khrihfabu caah cun Arfi bangin kan i zohthla/hngatchanmi asi. Pumhdih in Pastor he zarhkhat chung an tuah tuan ding/ kal um nak ding an i ceih dih in inn ah atin i, rawlei dih tlawmpal ah thutden(sofa) cungah TV zohpah in azau nak ah mual a kan liamtak hi asi” tiah an Khrihfabu chung simi Simon L Tlumang nih a chim.
DC area Maryland ah Falam lei unau pakhat Sang Lian Thang (67) kum zong nizan October 9 ni ah khan mual a liam ve. A nih hi accident ruang ah a kuah i kum saupi daycare in cawnghhramh le zoh khenh a rak si.
