Sex & Khristian Mino

Thuhmaihruai:

Nupa sinak (Sex) thuhla hi, innsang ah siseh, biakinn ah siseh sim le rel tlangnak tampi a umlo tikah, ṭhanthar zumtu mino pawl lamzin silo ah an pialnak a si tin, USA ih Mirang Pastor pakhat in a sim. Himi cahram ih tumtah bikmi cu:

Pathian ṭihzah mi le zohṭhimtlak Khristian mino si theinak ding.
Pathian ih pekmi nupa sinak (sex) theifiang ih, supaw nak nun nei le thianghlim ten nun theinak ding (I Pet. 1:15-16).
Bible ih simmi thawn kaihaw in, nupa sinak (sex) lamah thianghlim ten um theinak ding.
Nupa sinak (sex) ih ṭhatnak le ṭhatlonak pawl theithiam ih, tuah dingmi le tuahlo dingmi theifiang nak ding.
A thianghlimmi khawruah nak nei ih nupa sualnak hrialin, thianghlimnak in Pathian rian theinak ding (II Cor 7:1).

Hmaisabik ah, nitin USA ih thilcangmi pawl zohtlang uh si:

Ṭhihumnak neilo in nu 1,000 tluk naute nu an cang
Tleirawl 1,106 nau an thlak (abortion)
4,219 thleirawl (STD) timi zahmawh-hmasia natnak an ngah
Tleirawl 500 rittheih sii (drugs) an hmang thawk
1,000 thleirawl zu an in thawk
135,000 nauhak pawl in tlawngah meithal an keng
3,610 hmuhsuam tuar, 80 tluk sualpi (rape)
2,200 high school an bang (drop out)
2,750 nauhak pawl ih nu le pa an ṭhen aw
Nauhak 90 inn ihsin lak in, hmundang ah ret sak an si
Nauhak 7 (kum 10-19) thah tuar
Nauhak kum 17 tang mithah ruangah kaih tuar
Tleirawl 6 mah ten that aw (suicide)

A tlun ih thilcangmi pawl kan zoh a sile, ziangvek dinhmun ah le tikcu caan ah kan um ti fiangzet in kan thei thei. Sex cu a thianghlim mi le Pathian ih ṭha a timi a si ruangah, mai duhduh ih hman ding a si lo. “Sex cu Bible ih zirh le sim vekin nupi/pasal nei zo pawl in lawng hman ding a si” tin Billy Graham ih fapa, Franklin Graham in a sim. Fa le pawl hrangah nu le pa in sim le zirh ding ṭuanvo tumpi an nei.

Nupa neih awk hlan ih sex hman ruangih a cangsuak mi pawl:

Thianghlim nak a hlo
Duhlo cingih nau pai nak
Pa ṭhiṭha neilo ih fa neih nak
Duhlo cingih neih awk nak
Nau thlak nak
Nat siam nat ṭhalo ngah nak
Mah le mah phuhrung awk nak
Beidong nak
Mah le mah huatawk nak
Thlarau nun cau nak …..

Nupa neih awk hlan ih nupa sinak (sex) hman nak san hrekkhat

Nau neilo dingih kham awk ahcun, ziang hman a poilo tivek ruahnak ruangah
Biaknak lam ih tel tam lonak le pumpek awk nak mal ruangah
Inn sungsang buai nak, nupa ṭhenaw nak tivek ruangah
Inn sungsang ah nu le pa in zianghman (sex) lam an sim/zirhlo ruangah
Fa le pawl duhdawtnak an duh vekin an ngah/hmulo nak ruangah
Tuan tukin fala/thlangval neih nak ruangah
Rualpi pawl ruangah
Zuu le rih theih sii ruangah
Nau pai duh ruangah…..

Ziangtin kan hrial ding?

Sualnak cu thinlung ihsin a thawk. Bible siar in, Pathian hnen bawmnak dilin ṭan la aw.
Kawhhran caangvai nak ah tel ringring in, thlarau lam ah na thinlung ret tum aw.
Sex lamah, awl-ai ten cangsual thei ding na zum mi thawn lengsuak lo tum aw.
Hmunfal ah, mi pahnih lawng umtlang hrial aw.
Lawngfangkheh web site, cabu, zuk tivek pawl zohlo in um zuam aw.
Hivek lam ih harsat nak na neimi le na theih duhmi pawl nu le pa lole kawhhran lam ih ṭuanvo neitu sut aw.
Na rualpi pawl hmuahhmuah, sex lam ah, thianghlim na tum zia kha theih tir aw.
Ziang vek thlemnak ka hrangah, hrial a har/awl ti theithiam in, hrial thei ding in, timlam cia aw.
Tuk forhnak sungih, lut lonak ding le hiar fihlim awk nak dingin, a hleice in thlacam aw.
Thlemnak na ton ding theih cia ahcun, a si thei tawk in hrial aw.
Bible siar in thazang lak nak le pekawk nak hmang thiam aw (1 Cor 10:13).
Rualpi lole rinsan mi upa tivek, na harsat nak lole theih duhmi sim/rel pi aw.
Ṭongfang ṭha hmangthiam in thapek awk thiam ding. Ka tuah theilo, a harsa tivek hnakin, Pathian zarah awl ten ka tuah/hrial thei tivek ṭongkam hmang sawn aw.
Tukforh nak ih tlak sual le Pathian hnenah ngaithiam dil in, tuah nawnlo ding (1 Jn 1:8-9).

Ziang ruangah kan hrial ṭul?

Pathian thukham pahbal le Pathian ngaihsak lonak a si
Natnak tampi a suah tir thei
Thinlung a ti buai
Thlarau a cau tir. Thlarau a riahsia tir
Mi a phuhrung aw tir ih,Pathian ih duh dan a si lo
Taksa, thinlung, ruahnak a ti buai
Riahsia nak a suak tir sawn
Rin umnak a hlo tir sawn
Thin a bang tir
Duhdawtnak ngaingai a si lo
Nupa si tikih, sinak ding pawl a hlo tir
Neihaw tikih sunlawihnak a hlo tir
Nu le pa ṭhiṭha theilo le innsang mumal lo a suak tir
Fa sawn nei lole nauthlak nak a suak tir….

Bible ih zirhmi phun (7)

Taksa Pathian sunlawinak ah…(1 Cor. 6:18-20).
Sex cu nupi/pasal hrang lawng (Mt.19:4-5).
Sex cu Pathian duhzawng in hmangding. Nupi/pasal natnak, ṭahtirnak le ningzak nak ah hmanglo ding (Eph. 5:29).
Midang hiarhal nak thawn zoh hlah (Mtt.5:28).
Mah nupi/pasal an duhlo zawngin tuahpi lo ding (Rm. 14:1, 14).
Sualnak ih khatmi leimi vekin tuah lo ding (Rm. 12:2).
Thlarau thianghlim siarlo, zianghman in lo control hlah seh (1 Cor. 10:12, 10:23).

Thunet Nak:

Pathian ih tumtahmi nupa sinak (3) cu;

Nupa nei aw zo mi lawng in hman dingmi a si.
Nupi/pasal par lawngah rinum zetin hman dingmi a si.
Ci karh zai tir dingih hmang dingmi a si.

Pathian ṭihzah nak thawn dan thianghlim ih neihawk tiang hngak hi a sunglawi in, Pathian duh bikmi a si. Kan tisa duhnak hrialih, Pathian hrangih kan tuahmi kha Pathian ih duhbikmi raithawinak sunglawibik a si. Kan hrangih a ṭhabik, soiselbo A fapa neihsun in petu Pathian hrangah cun, kan ni khal in a ṭhabik le a thianghlimbik in nungin Pathian biak ding kan si. A thianghlimmi Pathian cu a thinghlimmi nun thawn biak in, cawisang uh si….Amen!

Zohṭhimmi

Josh McDowell’s & Bob Hostetler: “Counseling Youth” (A Comprehensive Guide for Equipping Youth Workers, Pastors, Teachers, Parents)

Barbara M. Kohl (D. Min): “The Role of the Church in Sex Education”

Kelli Mahoney: “Top 8 Ways for Christian Teens to Avoid & Overcome Temptation”

Justin Taylor: “Between Two Worlds”

John Daniel: “Seven Ways to Avoid Premarital Sex”

Cary Schmidt: “20 Reasons to Avoid Premarital Sex”

Christianmarriagetoday.com “Sex in the Bible”

A Publication Of the Billy Graham Evangelistic Association: “DECISION” Magazine

The Christian View of Sex: Janet Smith