Chin Community of Indiana (CCI) Riantuannak Cheukhat Zohthannak

Chin Community of Indiana (CCI) in nan kut kan in tlaih hna. Dam in nan um cio lai tiah zumhnak kan ngei. Khua caan hna ai thleng cuahmah i, khuasik thla cu kan panh ziahmah than cang. Nikhat hnu nikhat kan pawng kam ah thawngpang tha lomi hna tampi kan theih lio ah hin, Chin Community of Indiana (CCI) riantuan chuahnak kan ngeihmi thawngpang te te hna zong kan in thanh duh hna.

Indy um Chin Khrihfabu hna le Business hna, pumpak cio in CCI riantuannak nan bawmh chanh thawng in ni fatin in Chin Center cu Monday to Friday open a si peng i, Full time riantuantu pa (2) le volunteer hna hmang in ni fatin te mi tampi caah thil a phun phun cu tuah piak a si. September thla chung lawngte ah hin mi leng 512 cu Chin Center ah a ruang tampi kong ah an phan i bawmhnak pek an si. Hi lak ah hin rian a sawkmi tambik an si i, minung 145 zong hi September thla chung lawng ah rian an hmuh.

Cu hlan zong ah thlakhat ah minung mahzat si lo ah tam deuh lengmang hi Chin Center an panh. Mi tampi rian an hmuh khawh. Hi vialte hi Indy um Chin Khrihfabu hna nan thazaang chuahmi i a theipar cu a si. I lawm cio ko uh sih.

Chin Center ah volunteer hna le staff hna hmang in Citizenship sawk piaknak cu ni fatin te ti awk in tuahpiak a si. Phaisa tampi dih hau lo in, Chin Community of Indiana (CCI) riantuannak in mah hi hi tuah a si. Volunteer a kan bawmtu hna hi mirang le upadi a theimi lawyer hna zong an um ve.

Ho poh rak panh cio khawh a si.

Citizen caminpuai phitnak ding kongkau siseh, citizenship sining cang hna cawn piaknak hna zong cu Chin Center ah Monday, Wednesday le Friday tiin class kai khawh a si. Class caan le a ni hna cu www.indychins.org ah hin rak zoh khawh a si. Mah hi zong hi a man phalh hau lo in rak kai khawhmi a si.

Indiana ah hin Chin miphun a kan dawtu an um bantuk in a kan rem tuk lomi zong cu an um lengmang ve tihi kan theih cio ko lai. Rian tuannak zong ah kutka a kan on piakcuahmah mi an um bantuk in kutka a khar chuahmah mi zong cu an rak um ve. Cu tik ah Chin miphun hna nih riantuannak hmunhma thar a um khawhnak ding caah company thar hna kawl dign ah hin CCI nih tuanvo nganpi kan ngei. Rain hmun thar khur khawhnak ding caah CCI office manager hmang in ni fatin te rian hmun kawl a si. Chin Center office te awn ve a si caah, kan mah lei nih kan kawl bantuk in, an mah lei nih a rak kan kawl mi hna zong an um ve. Hi hi hi kan miphun dihlak caah that hnem santlai ngaimi a si.

Mirang ca cawnnak zong Chin Center ah tuah a si. A kai duhmi poh rak kai khawh a si. Mi tampi an kai cuahmah, ESL cawn ding siseh Citizen kong cawn ding siseh mah hi hna hi mirang hrimhrim nih an rak chimh mi a si i, a man a sunglawi ngai mi a si.

Hi hna pin ah hin CCI upa hna le Police lei tonnak siseh, a dang office dang dang lei tuanvo ngeimi hna he tonnak siseh, Community caah thil a biapi mi hna caah riantuan chuahnak le advocacy tuahnak tampi kan ngei kho.

Mah hi thil vialte caah hin, a cung lei kan chim cha bantuk khan, CCI riantuannak cu Kan community dihlak caah riantuannak a si. Aho hlei caah a si lo, kan community ah bawmhchan herhmi hna kan u kan nau, kan Khrihfabu i member cio hna caah a si. Minung pakhat te hmanh rian a tlamtling lomi rian an tlamtlin khawh tik ah, a chungkhar dihlak caah thil tha a si cang ko lo maw? Cu pin ah kan community dihlak huap in ‘aw pakhat’ in bia chim khawhnak ding caah siseh cozah lei he pehtlainak phunphun caah siseh, CCI riantuannak hna hi a um lo awk a tha lomi a si.

CCI riantuannak hi Indy um Khrihfabu hna nih nan rak dir kamh bantuk i, nan dir kamh pengding hi kan in nawl ko hna. Cu hlan ah Office caantling riantuan tu ding an um lo lio ah mi bawmh khawh mi a rak tlawm, si hmanh seh law office ah riantuantu 2 an vun um tik ah mi bawmh chanh khawhmi a let in a karh, i phaisa thazaang chuah a herhmi zong a let in a si ve cang. Rotary lei in bawmhnak tlawmpal a um, si hmanh seh law Khrihfabu han nih nan dirpinak le thazaang nan chuahnak hi a sullam a ngei bikmi a si i, a sunglawi khun mi zong a si.

Pumpak cio zong in siseh, Khrihfa bu upa hna a bu zong in siseh, Chin Center ah rak len le thlacamnak piaknak hna nan rak neih tawn ding in kan in nawl hna. Nan hmur ka le nan thlacamnak thazaang kan herh, nan thinlung le nan ruahnak cheuh kan herh lengmang ko.

Upatnak he,

Salai Biak L Sang

Secretary
Chin Community of Indiana