US cozah nih US ah a um lio mi Kawlram mi minung (30) cu Kawlram ah kuat than dingin le Kawlram cozah nih rak cohlang dingin tinh tuahnak an ngei tiah Kawlram ramdang lei vuanci zung nih phuan langhnak an tuah.
Hi Kawlram mi 30 hna hi, US ram chung ah upadi nawl a buar bal cangmi, case a nei bal cangmi hna an si tiah RFA Burmese program nih a thanh.
Kawlram cozah lei nih mah minung 30 cazin hna cu cohlan than ding ah harnak an ton mi kog US cozah sin ah an chimh ve hna. US cozah lei nih cazin an pekmi hna minung i cu hlan Kawlram ah a rak umnak khua hna an check tik ah a dik lomi tete zong tampi a um caah, Kawram lei nih an cohlang kho rih lo.
President Donal Trump cozah a kai khawh in ram dangmi an ram ah kuatnak policy a neih bantuk in an tuah cuahmah. Cu hlan President hna zong nih mah hi an rak tuah ve ko. Obama President tuan lio hrim ah US in Kawlram ah kuat thanmi Chin mi zong an rak um pah ve. Thong inn a tla bal i case dih lo mi, case a nganmi a neimi le court kai tbtk zei rel lo um mi hna deuh hi Kawlram kuat than an si.
USA ram ah ramdang mipen sathlai hna nih fimkhur tein le nawl ngai tein nun hi thil biapi tuk a si. Mi tha lobu he aa kom mi, fir le inn bauh hmang, zurit in mawtaw mongh, nupi fale cung ah kut thla mi tbtk hna hi Kawlram lei ah kuat than khawhnak tiang in a phan khomi case an si. Mi phaisa bawm hna a fir mi zong. A taitang ai zuarmi, nu tha lo dau a hmangmi hna, sivai tha lo drug a zuarmi le a hmang mi hna le midang he ai velmi hna zong an telh dih. Mah bantuk case a neimi cu Felony an si tiah hmuh piak an si ah cun an ram tiang kuat than khawh a si.
Chin mino hna a bik in ralrin a herh i, Indianapolis zong ah a rauh hlan ah action an lak chom lai tiah theih a si. Inn bauh le thilfir hmang vialte Chin mipi lak ah an um i cu hna zong cu rau lo tein Police nih a nin tlaih khawh hna i Kawlram lei ah a nin fim tawl te hna lai.
