September 27, 2017 chun i Southwest District detective pawl le Indianapolis khua um mi Chin miphun Khrihfabu hruaitu hna le Pastor le hna tiin i tonnak an nei.
“Zahan… itonnak ah kan u/pale tampi nan chuak kho hna i kan i lawm tak. Detective pawl he i tonnak kan hrih hnawh chan bik cu kan community chung i thil ttha lo a cang lengmang mi; inn bauh i thil fir, mawttaw fir, mi bawh i phaisa bawm chuh tbt. pawl report tuah ko mi zong ttha tthi in hlatpiak a si le si lo theih a si tawn lomi kong ah kan lungtlin lo nak langhter le thil sining kan chim dingin kan tuahmi cu a si.” tiah CCI President Pu Van Ceu Uk Khenglawt nih a chim.
Indianapolis khua ah thil poimawh a um tik ah Police sin thawng thanh a si nain, police nih hlathlainak zei hmanh an tuah ti lomi thil a um len caah hin Indy upa hna nih sia herhnak cu Police detective hna cu an chimh mi cu a si.
Report pek ning kong ah, Inn bauh le thil fir te pawl hi emergency a si lo caah 911 auh lo in 262 tips tu auh ah ttha deuh tiah an chim.
Mah hi he pehtlai in CCI President nih “Hi kong hi fiang deuh in zapi zong kan i chimh/thanh a herh telai. Inn bauh le thil fir tbt. ahcun 911 au lo in anmah police chung i community he pehtlaihnak lei ttuanvo ngeimi (community liaison) tu pehtlaihnak tuah i chimh ah a tlamtling deuh lai ti an zumh.”
Hlathlai piak lomi case a um tiah ruahmi cu Commandar pa kha chimh i amah nih follow up tuahpiak ding in a kan chimh. Cucaah, kan khuachung i inn bauh le thil fir tbt. pawl a um tikah report tuah hrimhrim ding. Report tuah tikah Chin Center zong ah report pek ve ding. Chin Center nih community liaison le a herh ahcun commander pa sinah follow an tuah lai.
A tawinak cun, mipem/ralzam kan si ruang ah zeirel lo le daithlanh in nan kan um maw ti kan lungtlin lo mi an theih. Report tuahmi ttha tthi i hlathlai lomi a um ahcun community liaison sin le commander pa sinah chimh le hlathlainak tuah tawn ding ti kha kan biatlang pi cu a si ko.
