A ra laimi April 21 Zarhte ni ah Chin Community of Indiana (CCI) nih kumkhat ah vuikhat tuah tawn mi Annual Assembly meeting cu tuah dingin tinh tuahnak kan ngei. Mah hi annual meeting ah hin Indianapolis khua i Chin mi Khrihfabu kip in hruaitu hna cu sawm an si. Khrihfabu cio ah cakuat pek an si dih.
Meeting tuahnak ding caan cu 1:00pm – 6:00pm tiang a si lai. Ahmun cu Chin Center ah a si lai.
Meeting kai dingmi hna cu milu 100 in a tang lei poh cu palai (1) i thlah ding a si. Milu 101-300 kar simi khrihfabu nih Palai (2) thlah ding a si. Milu 301-700 tiang simi Khrihfabu hna nih palai (3), le 701-1000 nih palai (4), 1000 luanmi Church nih palai (5) tiin thlah cio ding a si. Church cio in nan rak i tel dih dingin kan in sawm hna.
Kumkhat ah vuikhat annual meeting hi a um zungzal mi a si i, Indy ummi Chin mipi hna caah that hnem santlai dingmi bia ruahnak le bia khiahnak hna cu tuah a si tawn. Mipi nih na kan dirpi nak thawng in CCI cu kum khat hnu kumkhat a thancho chin lengmang i, nihin ni ah minung 2 full time employee zong kan ngei kho cang hna. Ni fatin in rian kawlpiaknak siseh, a herhmi phone chawnh piaknak le social rian bawmh chanhank tete cu dong cat lo in mah Staff hna le volunteer hna nih a kan tuah piak hna.
CCI cu mipi thazang in mipi nih nan dirpi lawng ah mipi caah riantuan khomi mipi nih ngeihmi bu a si. Cozah lei le a dang dang phu le bu hna sin in bawmhnak hna zong cu banh khawh zat banh i sawk a si nain, a tlawm taktak te lawng si rih. Staff hna tam deuh kan herh lengmang cang i, hruaitu tha hna zong kan herh hna.
