June 1, 2016 ni thawk in Chin Center Office cu Monday to Friday awn than a si cang lai timi thawngpang tha ka nin thanh hna.
Full-Time office manager pakhat zong kan ngei cang lai. Chin Center Office Manager a kan tuanpiak ding cu Pu Moses Lian a si.
Pu Moses Lian cu CCI nih caantling riantuantu ding ah hire a si cang. Anih hi cu hlan ah Zion Charity tiin rian kawlpiaktu a rak si i, minung tam lak te rian a hmuh piak hna.
USA ram Indianapolis khua ah a khuasaknak caanzong a sau cang i, khua siningcang le a bik in rian kawlpiaknak ah Indianapolis um Chin mi hna caah tampi rian a kan tuanpiak khotu a si.
Office Manager cu cawn Nikhat ni in Ninga ni tiang cantling in Chin Center Office ah athu lai i, a tang lei kong hna ah siseh a dangdang herhbau kong hna caah mipi bawmhnak rian a tuan lai.
Rian Kawl Piaknak : Chin Center Office Manager nih a rian ngan bikmi pakhat cu rian ngei lomi, rian tlamtling lo mi hna caah rian kawlpiak hi a si. Rian tlamtling lomi hna poh nih Chin Center fuh khawh si cawlh cang lai.
Green Card Sawkpiaknak : Greencard sawk awk a tha cangmi hna caah Greencard sawk bawmhnak zong a um lai.
Ca Herhbau Relternak: Ca phunphun lung fiang lomi hna um cun, Office manager sin ah rak relter awk a tha lai.
Foodstamp, Medicaid tbtk kong kau: Foodstamp le Medicaid kong he pehtlai in pawimawh mi hna um ah cun, office manager fuh awk a tha lai. Amah nih thil tlamtling in tuahpiak khawhnak cu a um lai lo nain, a tha bikin tuah dingmi le kalnak ding hmun le hma hna “Referral” tuah piak awk a tha lai.
Adang dang: Court kong ah maw, DUI kong ah maw, Palek nih tlaih khih tongmi hlamnak ding ah tbtk cozah lei siseh police lei he ai pehtlaimi hna kong ah ruahnak hal awk le kalnak ding hmun le hma hna kong ah siseh, sizung, bank, internet sawkpiaknak tbtk le a dangdang thil pawimawh kong hna ah Chin Center panh awk a tha lai i, Office Manager nih hin dihlak 100% an kan bawmh khawh dih lai tinak cu a si lo. Tuah awk a tha bik dingmi le kalnak hmun, chawnhnak dingmi ph tbtk tha bikmi “Referral” cu a kan tuah piak khawh lai.
Office manager i a rian ngan bik cu riankawl piak a si lai caah, Office lawng ah a thut peng awk cu a tha tuk lai lo, a leng ah a kal can hna um lai caah kan dihlak in theih thiam piaknak kan ngeih ding zong ah ka nin nawl cia hna.
Chin Community of Indiana (CCI) nih riantuannak ah hin a cung lei i thil hna pin ah hin cozah lei pehtlaihnak kong ah siseh, kan pawngkam mirang hna he pehtlaihnak ah siseh CCI nih rian a tuan chuah cangmi, a tuan cuahmah mi le a tuan rih dingmi thil tampi a um rih i, mirang holh in “Advocacy” timi zatlang caah biachim khawhnak thazaang zong CCI nih a ngei. Hi pin ah hin, Chin Center ah cantling riantuantu ding a dang zong hire chap ding ah CCI nih kan i zuam cuahmah rih.
Upat awktlak Khrihfa bu kip hruaitu hna, Pastor le hna le Indianapolis um bu le phu cio in upa hna dihlak zong nih CCI riantuannak cu nanmah riantuannak a si ti-in CCI office manager he pehtlaihnak tha nan ngei khawh cio ding zong ruah channak kan ngei. CCI cu Chin Community ta a si, Khrihfa bu kip ta a si, Chin miphun dihlak funtom tein hmun khat ah riantuanttinak hmun a si bantuk in, kan dihlak ruahnak tha peknak in siseh ttan la tti cio ding zong ka nin nawl hna.
Kan dihlak caah thawngpang tha a si theo lai ti zumhnak kan ngei. Kan Khrihfa bu cio ah mah thawngpang hi rak i thanh cio uh sih.
